أسئلة مهمة من مذيعات التلفزيون السوري
ليش مذيعاتنا دائما عندون نفس الأسئلة؟؟
ليش كل الشعب حفظان شو هي هالأسئلة؟؟
ليش ما بتتغير هالأسئلة؟؟
يعني المذيعة بتروح على شي حديقة أو شي مطرح متجمعين فيه الأولاد الصغار بالعيد .....وبتبلش بالأسئلة الفذة تبعونها....
اشتريت لبس جديد على العيد حبيبي؟؟؟
يعني شو بتتوقع يقولها؟؟
لأ...ما اشتريت لبس جديد....هادول سرقة من على حبل الغسيل تبع الجيران...؟؟
ولا ولا بتتوقع يقولها...
أخدت لبس أخي الكبير تبع السنة الماضية ولبستو...؟؟
طيب بركي فعلا كان في ولد هيك وضعو....ليش حتى تسألو وتكسرلو نفسيتو لهالولد هاد....قدام بقية الأولاد
شو بتشتري بالعيد...شوكولاته وأكلات طيبة؟؟
يعني الولد الصغير شو بيحب يشتري وياكل؟؟ مجدرة ولا عدس بحامض ؟؟
شو بتعمل بالعيد احكيلنا حبيبي....بتلعب بالمراجيح؟؟
لأ أبدا...ما بقرب صوب المراجيح....بالعيد بروح بلعب مصارعة رومانية...وشوية تايكواندو....
بتلعب مع أصحابك بالعيد؟؟
أعوذ بالله...شو مع أصحابي...أبدا...بنزل بلعب مع شوفيرية التكاسي والزعران...
مع مين بتحب تروح بالعيد؟؟ مع ماما ولا بابا؟؟
الله ياخد الـ 2....الـ 2 أسئل من بعضون....ما بينطاقو...
طيب مذيعاتنا المهمات...ما عبيلاحظوا كيف الولد عبيتلعثم...وعبيتلبك...وما عبيعرف يحكي...ومالو رايد يحكي....وبلشت تشط ريالتو من العبطة...وما عبيطلع صوتو....وما عبيحكي شي....؟؟؟
هالمذيعة الحنون هاي....ما عبيطلع من خاطرها تترك الولد بحالو؟؟
ما عبتلاحظ إنو الولد ما بدو يحكي....؟؟
لك اتركيه بحالو....
ما عبتلاحظ المسكين قديش انعبط ومتدايق وعلى شوي راح يبكي بدو ماما...نزعتلو العيد وأبو العيد....إي شو هالحنية الزايدة هاي؟؟
يحرق حريشون على هالأسئلة....
طيب وليش وقت يعتقوا الولاد الصغار من هالغلاظة والسخافة والسئالة والتفاهة تبعون....وبيتحولوا على الأهل.....
بتلاقي المذيعة فايتة على شي مطعم...مشان تنقل صورة عن الجو العائلي بالعيد....
طيب أنا طالع مشوار مع عيلتي...جاي على بالي أقعد معون ونروق على بعضنا ونهدي أعصابنا....ليش تا تجي هالمذيعة تنغّص علينا....
وكل مره تفس الأسئلة....
أخي....ليش ما تنسن بشي قانون من قوانين الأحوال المدنية؟؟
نعم بالعيد ...بنعمل حلويات العيد...دمشق من حلوياتها الشعبية البرازق وقراص بعجوة والغريبة....وحمص زنود الست والفيصلية...وحماة حلاوة الجبن....وحلب الكرابيج والمعمول....والجزيرة بالحنيني والشعيبيات والمدري شو....وكل محافظة بتعمل نفس الحلويات المشهورة فيون كل عيد....
لازم كل عيد...نسمع نفس الأسئلة ونفس الإجابة؟؟
طيب ليش ما ينزل قانون تاني يثبت باقي الفعاليات...؟؟ تا نرتاح ....
المذيعة: تكرار تكرار تكرار....
نعم خيتو....بالعيد بنزور الأقرباء...نعم...وهنن بيزورونا...نعمين...وغيرو؟؟
المذيعة: تكرار...تأتأة...تكرار....
إي نعم...العيد مناسبة لالتقاء الأهل.....غيرو
المذيعة: ....."حسبي الله ونعم الوكيل على هالسيرانة"....
إي أكيد بنتصل بالأهل بأول يوم العيد وبنعايد عليهوم....((يعني متوقعة أقولها ..لأ ما بتصل بحدا؟؟))
المذيعة: ...ثصع90رىة2ةم32ق890رمس "ريتها باطلة ومحولة هالطلعة اللي طلعناها"....
إي نعم.. اشتريتلون للسعادين ولادي تياب جدد.... ونزلنا معون على السوق أنا ومرتي...نعم بنتعاون بالسوق أنا وزفت الطين مرتي.... وهلكنا من الزحمة وهلكنا من رفع الأسعار وانضربنا على قامتنا وقررنا نعيّد متل بقية الناس والبشر....
المذيعة: .......
نعم مرة تانية نؤكد على أن العيد مناسبة لاجتماع الأقرباء....نعم مناسبة اجتماعية ...تماما....
المذيعة:...#`...#(....
يعني شو دخل أبو اللي خلف أبوكي مشان تسأليني إذا بنروح أول يوم العيد عند أهلي بالأول ولا عند أهل مرتي؟؟....
ألعاب نارية...خلفية من الورود والأزهار...أطفال يلعبون بالمراجيح....ويتجمعون حول بائع البوشار....
وجملة...عيد سعيد....
إي شكرا...
الرئيسية 